Storia dla musiga

Dies ist eine kostenlose Homepage erstellt mit hPage.com.

Storia dla Musiga

 

Musiga San Ciascian ann 1927 © Musiga San CiascianAl ê en la festa de Santa Maria de setëmber (08.09.) dl ann 1927, canche i fredesc jomelins Sepl y Fedel Frenademez d’Ianesc da San Ciascian jê ite por la strada de Valparora por rové sön le ju de Falzares. Le tru che se tirâ en lunch, ti dê ai dui jogn ocajiun da fá vigni sort de discursc, recordan i bi agn dla passada infanzia. Ai jê inant cuntan de matades y stories de stríes y de striuns, de Salvans y de Ganes, che ai av aldí a ciasa y al tëmp dla scora dal maester; tla finada esi ince gnüs a cunté dl laur da vigni dé.

Le laur, minâ Fedel, é bëgn dërt, sce al n’é nia massa posoch; mo, al é porater de morvöia che, plü dür che al é y plü che al fej gní la bona löna y porta ligrëza y contentëza tla vita düra dla jënt dles muntes. Sepl cherdô de savëi na medejina por parè demez la stanchëza dl laur: an messess mefo se inventé val’devertimënt y passé en bona compagnia le tëmp dles ores do vöies intratan l’inver lunch. Sce an pësa dô, tröc á ligrëza cun l’jüch dles chertes da carté, atri cun l’cunté stories y recordënzes da zacan pro n bun got de vin y tröc chidla gian. Atri indo se devertësc cun soné i orghi, cun le balé o le cianté: n bel cor de ciantarins fajess mefo aorela cörta y metess ligrëza tl cör.

Cun chisc pinsirs se avi spo fat fora i dui jogn de porvé da mëte sö na musiga por passatëmp y devertimënt dla jonëza da San Ciascian: dit y fat!

Cun le consëi y l’aiüt dl maester Giuvani Piccolruaz, el gnü fat i pröms vari por mëte a jí l’idea de mëte sö na musiga.

Musiga San Ciascian ann 1967 © Musiga San CiascianAla pröma cherdada se avel abiné adöm 34 jogn entusiasć de musiga, che av fat fora de se cumpré vignun so stromënt y de paié düc deboriada n espert insegnant de musiga. Al ê gnü tut sö contat cun Giuvani Mahlknecht da Palma de Gherdëna por fa chësc laur, che se av sciacaré ite lignan de cir, deach al ê scoltur de profesciun.

Cun ligrëza y scerieté y cun troc sacrifizi, av metü man l’altonn 1927 l’istruziun, che av doré, cun tröpes proes, dui agn alalungia; spo sonâ la musiga da sora inant sot ala direziun dl maester Giuvani Piccolruaz. La pröma ota che la musiga da San Ciascian se av fat aldí ê en gaujiun dla prozesciun dles Antlês dl 1929 cun bravüra y gran ligrëza de döta la jënt dl paisc. Insciö el gnü soné inant cun entusiasm y sacrifizi incina che al av scomencé la secunda vera dl monn, canche ala ê jüda indalater.

Mo l’incherscimun do la musiga se fajô sintí y dl 1947 él indô gnü scomencè da soné, cun la maiú pert de musicontri nüs y valgügn de vedli lapró sot ala direziun dl dirighënt Sepl Frenademez da Dlira. Dô süa mort av spo tut la direziun l’orghelist Fedel Tasser y dedô, dal 1965, Vijo Frenademez, che cun pasciun savëi, maestria, paziënza, tröpa bria y ligrëza, l’al portada a n bun livel de perfeziun por sodesfaziun personala, por ligrëza y amiraziun di sciori y la bëgnmiritada sodesfaziun de döt le paisc. Dedô él sté Corrado Granruaz che á tut sö la bachëta da dirighënt, cun chël che la musiga é ince rovada a n bun livel.

Musiga San Ciascian ann 1977 © Musiga San CiascianDl 1967 á la musiga podü festejé l’iubileo de 40 agn de vita y ai 11.09.1977 chël di 50 agn cun diploms de bëgnmirit a tröc musicontri, cun la presënza de autorités y de döta la popolaziun dl paisc. L’ombolt, Otto Pizzinini á albü parores de regraziamënt por le gran laur paziënt dl dirighënt y de düc i musicontri y se á racomanè de tigní dür y da soné inant por l’bëgn y la ligrëza dla jënt y a onur dl paisc da San ciascian. En chëra ocajiun ti el ince gnü surandé ala musiga y benedí da Don Oreste Chizzali la bandira nöia, ofrida dal Hotel Rosa Alpina.

Le tëmp passa y la musiga vá inant cina al ann 1991, canche l’ativité s’á archité ia. Mo l’incherscimun do la musiga chersciô y tl 1996, 15 jogn cun na gran vöia de soné, se á metü adöm y á indô metü a jí la musiga.

Musiga San Ciascian ann 2012 © Musiga San CiascianTl 1997 á la musiga ciafé n local nü por les proes tla bela y gran ciasa dles uniuns „Jan Batista Rinna“. Tl 1999, en gaujiun dla festa de San Florian, á la musiga podü benedí les troht nöies.

Dala refondaziun tl 1996 á la musiga albü chisc dirighënc: Glira Andrea, Kaneider Klaus, Agreiter Ivan, Thaler Matthias, Federa Giuliano y Donazzolo Davide. Sciöche presidënc él sté: Pescollderungg Christian, Rudiferia Mirko, Clement Heini y Agreiter Ivan.


Aldedaincö sona la musiga da San Ciascian suradöt por les festes de dlijia (San Ciascian, San Florian, Pröma Santa Cumuniun, Antlês, Festa dl Cör de Gejú, Rorate, y i.i.), tëgn conzert d’aisciöda, conzerc serai d’isté y vá ince val’ iade a soné foradecá, sciöche por ejëmpl ala “Festa de Ra Bandes” a Cortina, ala “Gran Festa da d’Istá” a Canazei o al “Traubenfest” a Maran.


Test en pert tut dala publicaziun "Calënder Ladin 1978", dè fora da "Ert pur i Ladins dla Val d'Badia y Marô", plata 60, "Festa de 50 agn de vita dla müjiga da San Ciascian"

© Musiga da San Ciascian

Dies ist eine kostenlose Homepage erstellt mit hPage.com.